«Мемлекеттік қызмет –елдің мүддесіне адал еңбек»

Мемлекеттік қызметкерлердің басты қағидасы – халыққа адал қызмет ету. Мұны олар ешуақытта ұмытпаулары керек. Халыққа жақын және әр істе «қара қылды қақ жаратын » әділ

болулары тиіс деп ойлаймын. Әрбір адамның мұң-мұқтажын түсініп , дер кезінде орындай алмаса да дұрыс жауап беріп, шығарып салу қажет. Себебі , «Ұлық болсаң, кішік бол» демеуші ме еді дана халқымыз? Ендеше, мансапқорлық көрсетпей, білікті де білімді қызметкерлердің сөздері мен істері ұштасып жатуы тиіс.

Әдепті, сабырлы да шыншыл әрі ұлтжанды қасиеттері мол азаматтардың мемлекеттік қызметтерді атқаруы ел мүддесіне зор үлес қосады.

«Тәуелсіздігіміздің мызғымас тірегі- жастарымыз »- деп жатады мінбедегі министр мырзаларымыз. Сол жастар бүгінде мектеп қабырғасында білім алып жүрген біз емеспіз бе? Бізге артқан үміттері мен мол сенімдерін ақтау үшін білім мен қоса ұлттық тәрбиенің бесігінде тербелуіміз қажет . Отбасында «өтірік айтпа, біреудің затын рұқсатсыз

алма » деген сияқты сөздерді күнделікті құлағына құйып өскен азамат ешқашан қиянатқа бармайтыны сөзсіз. Өйткені ,олар өз мойнына жүктелген үлкен

жауапкершілікті сезіне білетініне ешкім шүбә келтіре қоймас деп ойлаймын. Отанына адал еңбек еткен азамат абырой – атаққа қол жеткізеді. Өкінішке орай,

ел мүддесінен жеке басының қамын ойлайтындар кездесіп жатады. Көпке топырақ шашудан аулақпын, әрине. Дегенмен, мемлекет қазынасына қол сұғып, өз қалтасын

қампайтқандар қаншама? Еңсесін көтеріп, егеменді ел атанған шақта отанымыздың «қасықтап жиған несібесін уыстап шашқандарға » таң қаламын. Мұндай азаматтарға

отбасында ата- анам үнемі айтып отыратын:

«А» дегенің Алла,

Адамдықтан танба.

Аспанда Алла көріп тұр,

Бөтен затты алма,- деген өлең жолдарын күнделікті қайталап отыруына кеңес берер едім. Мен

өскенде егеменді елімнің гүлденуіне өз үлесімді қосу үшін мемлекеттік қызметкер

болуды армандаймын. Осы асқақ арманыма қол жеткізу жолында ата- анам мен

ұстаздарымның адал еңбектеріне сүйсіне қараймын.